نوشتہ کار:ساقب بلوچ
:درستی راستی
لبرلزم اسہ سیاسی و معاشی نظریہ ئسے ہرانا مسخت بندغی آجوئی ،بریبری، حکومت آن آجوئی نا زی آٹے۔ لبرلزم بنیات آن یورپ نا کنڈان مونا بریک، انتئے کہ او وخت آ یورپ ئٹی بادشاہت و ایلو مذہبی بندغ آتا حکومت مریک۔ مطلب چرچ بندغ آتا زی آ جتا جتا غا چم آتا کمک اٹ حکومت کریکہ و اوفتا حق آتے تتوکہ۔ دا ہیت آک 15 میکو صدی نا ءُ، ہرا وخت آ پُوسکن لبرلزم نا نظریہ مونا بننگ ئسکہ۔ اندن جتا جتا انگا وخت آتیٹ جتا جتا انگا تدینی تا سوب آن لبرلزم ٹی ہم مٹی بس دنکہ فرانس نا انقلاب، صنعتی انقلاب یا کہ انگلینڈ ئٹی سی سالی جنگ ہرافتا سوب آن لبرلزم نا نظریہ بندغ آتیٹ ہندی مس۔ جون لاک لبرلزم نا اولیکو فلاسفر ءِ، اونا باوہ پاننگک۔ اندنکہ جہان ٹی مٹی بریک لبرلزم ئٹی ہم مٹی برسا کیک وجتا جتا انگا بشخ آتیٹی بشخ مریک۔ ہرافتیٹی دود و ربیدئی (کلاسیکل)لبرلزم ، ماڈرن لبرلزم یا پوسکنا لبرلزم.
:لبرلزم نا پدندارہ
لبرلزم نا دیہاڑ ءِ ہُرن گڑا ننے سما تمک کہ لبرلزم اسہ بھلو جنگ اسے آن پد مونا بریک۔ شانزدہ میکو صدی اٹ 30 سال نا جنگ ہرا کہ بادشاہ و اُلسی نمائندہ تا نیام ئٹ مس، ہراکہ (1618-1648) اسکان چلنگا۔ ہراتم کہ اُلس جنگ ءِ کَٹا گڑا حکومتی طاغت بادشاہ و اُلس نا نمائندہ تا نیام ئٹ بشخنگا۔ انگلینڈ اولیکو لبرل حکومت والا ڈیلم جوڑ مس و لبرلزم نا سیاسی سُرگھچ ءِ اسہ پوسکنو دروشم اس دوئی کرے۔او جتا جتا غا فلاسفر آتا فلسفہ آک لبرلزم ءِ جتا ءُ دروشم اس تسر. اندنکہ اولیکو دور ئنا فلاسفر آتیٹی جون لاک، آدم سمتھ بلا پنک ءُ۔ اگہ نن لبرلزم نا بُنداو ءِ ہرن گڑا ننے سما تمک کہ لبرلزم یورپ نا اِرا بُنداوی دود آتیان پیشتمانے، اولیکو اوفتا تپئی اسٹرکچر ئس ہموڑان انتئیکہ اوفتا تپئی اسٹرکچر ئٹی انفرادیت نا جاگہ ئس، اگہ نن ایلو جاگہ آتے آ ہرن گڑا ایلو چاگڑد آتا تپئی اسٹرکچر ئٹی انفرادیت نا ہچو جاگہ اس دو بفک، ولے یورپ نا تپئی اسٹرکچر ئٹی ہمے وخت آن انفرادیت نا جاگہ مسنے اندا سوب آن لبرلزم یورپ ئٹی زو مونا بس۔ ایلو گڑا گوہ (کامپٹیشن) ئس ہرانا سوب آن لبرلزم یورپ ئٹی زو ردوم ہلک، یورپ ئٹی ہر گڑا ٹی اوفتا گوہ ئنا ربیدہ ئس، دنکہ عئید آتا وخت آ جتا جتا ءُ ریس ئنا پروگرام/ مُچی اڈ تسرہ، دنکہ ہُلی دودیفنگ، شِست خلنگ و پین اندنو پروگرام اڈ تسرہ، اگہ نن ہرن اوفتا سیاسی و زرگزرانی زند ئٹی ننے گو رسینگک، دنکہ سیاسی پارٹی تا نیام ئٹ گچین کاری، اندن مارکیٹ ئٹی آزادانہ پوریا نا گو مریک اندا سوب آن کہ یورپ ئٹی سیاسی و زرگزرانی زند مچا اداراتی گو ئٹی گنڈوک ءِ۔ اندا اِرا گڑا نا سوب آن لبرلزم یورپ ئٹی زو رُدا و تینے یورپ نا بندغ آتا ملی ٹی خؤندی کرے۔
اگہ نن لبرلزم نا سیاسی سفر نا بِنا ءِ پٹن گڑا ننے 16 میکو صدی آن مست داخس رسینگپک، ولے لبرلزم نا دیہاڑ ءِ ہرن گڑا ننے مڈل ایجز یا اوکان مالو نا دور باری ٹی رسینگک۔ مڈل ایجز آتیٹی بندغی حق آک و زمہ واریک ہمو وخت انا چاگڑدی زند ئٹی گنڈوک نظر بریرہ۔ مڈل ایجز نا وخت آ یورپ ئٹی مدان مدان آ بندغ آک شاری پوریا نا زند ئنا پارہ غا ہِننگ ئسر، اوکا پد ریناسینس کہ ہمو فلسفی مٹی تہ کہ یورپ ئٹی بس، داکان پد یورپ ئٹی پروٹیسٹنزم نا چول اس بس 1۔ میکو صدی اسکان مُست انا جاگیر داری نظام پِنا، اندا سوب آن بادشاہ و مذہبی کسرشون تا زور مُچا یورپ آن چُٹا۔ دافتا زور ئنا سوب آن یورپ نا باتی تا نیام ئٹ 30 سال نا تین پہ تین نا جنگ اس مس۔ لبرلزم نا رُدنگ ئٹی منہ انقلاب نا، منہ جنگ آتا منہ فلاسفر آتا بھلو کڑد ئسکہ، انقلاب آتیٹی امریکی انقلاب (1775-1783) ایلو فرانسیسی انقلاب (1789) نا سوب آن لبرلزم یورپ ٹی زو ردوم ہلک، ارٹمیکو جنگ آتا سوب آن انگلینڈ ٹی (1651-1642) اسکان خانہ جنگی اس مس ہرانا سوب آن لبرلزم یورپ ئٹی زوت مونا بسک، مسٹمیکو فلاسفر آتا نظریہ غاک ئسر ہرافتا نظریہ غاک لبرلزم ءِ بُنداو تسر و مونا ہیسر، اوفتیٹی جون لاک و آدم سمتھ نا پن کل آن مونا ٹے۔
اولیکو جہانی جنگ ہراکہ دنیا ٹی اسہ بھلو بُمبیلی اس ہیس گُڑا امریکہ نا سروک آک دنیا ٹی جنگ آتے ایسر کننگ کن و دنیا ٹی ایمنی ہتنگ کن اسہ نظریہ اس ہیسر ہراٹی او ڈیہہ تے اسہ ہند آ ہیسر و اسہ گل اس جوڑ کریر ہرانا پن لیگ آف نیشنز ئس۔ اندا پوسکنا نظریہ ءِ ماڈرن لبرلزم نا پِن تننگا. دا ادارہ ڈیلم آتا نیام انا جیڑہ آتے ہیت و گپ اٹ حل کننگ نا کوشست ءِ کریکہ۔ دا نظریہ نا سوب آن لبرلزم اسہ پوسکن ءُ دروشم اسیٹ مونا بس، ہرا لبرلزم ءِ جہانی سیاست (international politics) ٹی ہیس۔ جہانی لبرلزم نا بُنداؤ آن جہانی ادارہ تا باروٹ ہیت کیک کہ دا ادارہ غاک باہدے مریر و دا جہان نا سیاست ئٹی تینا کڑدار ءِ سر ایتر، اندن کہ ڈیلم آتا نیام اٹ ویل آتا حل، جنگ آتے ایسر کننگ کن دنیا نا ڈیلم آتا نیام ئٹ رواداری مرے۔ اوفتا خیال اٹ دا نظریہ نا وسیلہ اٹ دنیا ٹی جنگ آتے ایسر کننگ کینہ و ڈیلم آتا نیام اٹ رواداری جوڑ مننگ کیک۔
:لبرلزم نا اپروچ
لبرلزم نا اپروچ بھاز بھلو ئسے ہرا بندغی حق، بندغی برابری، سیاسی حق، ہیت ئنا آجوئی، آجو زرگزرانی بندوبست، حکومت، حکومت نا کڑدار، و اندنکہ وخت مرسا کرے گڑا لبرلزم ئٹی ہم مٹی بس، اندن کہ کلاسیکل لبرلزم آن ماڈرن لبرلزم، اوکان پد نیو لبرلزم بس۔ بُنداوی ردئٹ دا جمہوریت نا ہیت ءِ کیک، لبرلزم تینا بُنداوی اہمیت بندغ، شاری یا ایلو مفاد آتیان دُن کہ راستی نا منوک (حقیقت پسندی) ریاست ءِ بندغ آتیان زیات اہمیت۔ کل آن مست نن بندغ نا آجوئی نا باروئٹ ہیت کین، جون لاک بندغی آجوئی نا باروئٹ پائک کہ بندغ آجو ودی مریک، آجوئی اونا فطری حق ءِ۔ لبرلزم پائک کہ بندغ آجو مرے، او تینا زند نا ہر فیصلہ ءِ تینٹ ہلے۔ امر کہ اونا خوائشت ءِ او ہمو حساب ئٹ تینا زند ءِ گدارے۔ تینا مفاد آتے دوئی کننگ کن آجو مرے۔ اونا آجوئی نا نیام ئٹ کس بف، ولے او ریاست مرے یا چاگڑد نا پین بندغ اس اودے دا حق اف کہ او ایلو نا زند ئٹی یا اونا آجوئی ءِ پُلے۔
لبرلزم نا ایلو خیال بندغی بریبری نا زی آٹے، چاگڑد ٹی غُٹ بندغ آک بریبر ءُ، کل بندغ آتے چاگڑد ئٹ اسہ وڑ ہُننگے۔ بندغ آک زنک، چاگڑدی کدکاٹ نا بنداؤ آ چاگڑد ٹی شیف بڑز ہُرنگپس، ایلو بندغ آتے نیاڑی و نرینہ نا حساب آ چاگڑد ئٹی ہُرپس مطلب کس نرینہ اسے گُڑا او بڑز ءِ اگہ نیاڑی اسے گڑا شیف خلنگے۔ بلکن ہر بندغ ءِ قانود نا حساب آ ہُننگ مرے۔
لبرلزم نا بنداوی تھیوری پائک کہ حکومت نا زور اسہ سیم اسکان مرے، مطلب قانود نا حساب آ مرے او حکومت ءِ ہمو جاگہ نا بندغ آک جوڑ کیر و ہر فیصلہ ٹی ہم اوار مریر مطلب یا او تینٹ ہر وڑ ئنا فیصلہ ٹی اوار مریر یا او منہ بندغ تینا چاگڑد آن گچین کیر و بندغ آک اوفتا فیصلہ آتے کیر۔ دنکہ نن ہرن دنیا نا ہر ریاست اٹ لبرل جمہوریت جتا ءِ، دنکہ امریکہ ٹی ہرن گڑا بندغ آک گچین کاری نا وسیلہ اٹ تینا نمائندہ غاتے اسمبلی آ گداریرہ و ہمو بندغ آک تیوہ چاگڑد نا فیصلہ غاتے کیرہ، اگہ نن سوئزرلینڈ ئنا مثیل ءِ ہلین گڑا ننے سما تمک کہ اوڑے چاگڑدی جنجال آتا زی آ ہم گچین کاری مریک و اگہ گیشتر بندغ آک او گڑا نا حق ئٹی مسر گڑا ہمو فیصلہ مننگ کیک۔
لبرلزم نا اسہ خیال اس معاشی لبرلزم پاننگک، ہرا 18 و 19 میکو صدی ٹی مونا بس، معاشی لبرلزم اصل ئٹی مرچنٹلزم نا مقابلہ ئٹی مونا بس، دانا سوب آن کیپٹلزم و صنعتی انقلاب ہم بس۔ دا بنداؤ آن آدم سمتھ نا خیال ئس۔ ہرا کہ تینٹ اولیکو لبرل فلاسفر پاننگک. دا نا بنداوی گِڑا تیٹی آزاتی ئٹ مارکیٹ و تجارت، حکومت مارکیٹ نا پوریا ٹی دُو شاپ، و بندغ آتا جند ئنا جائیداد نا حق ئنا رکھ ءِ کے۔ لبرلزم پائک کہ مارکیٹ نا پوریا آجو مرے ہرکس پوریا کننگ کے و حکومت نا مارکیٹ تون ہچ ءُ سیالی اس مف، حکومت نا کاریم بس انداخس مرے دنکہ چوکیدار نا کاریم مریک کہ او بیرہ بندغ و پوریا نا رکھ ءِ کے۔ ہر بندغ ءِ دا حق مریک کہ او اخس تینا جند ئنا جائیداد تخنگ کیک تِخے و اوڑتون کس کاریم تخپ۔
لبرلزم ءِ اگہ نن جتا جتا آ بشخ آتیٹی بشخ کین گڑا چار بشخ ئٹی مننگ کیک: کلاسیکل لبرلزم، پُوسکنا (ماڈرن) لبرلزم، معاشی لبرلزم و سیاسی لبرلزم۔ کلاسیکل لبرلزم ریاست نا سیم آتا پائک مطلب حکومت بندغ آتا رکھ و چھیٹ ءِ کے دنکہ چوکیدار اسہ گڑا ئسے نا خیالداری ءِ کیک، اسہ آجو ءُ مارکیٹ اس مرے ہراڑے ہر بندغ پوریا کننگ کے، ہر اسہ بندغ ءِ تینا جند انا جائیداد تخنگ نا حق مرے۔ اگہ نن پُوسکنا لبرلزم ءِ ہُرن گڑا او پائک کہ حکومت بندغ آتے خوانفنگ نا زمہ دار ءِ و بندغ آتیکن خواننگ نا آسراتی جوڑ کے۔ چاگڑد نا جُوانی کن تینا کڑدار ءِ سر ایتے، و چاگڑد ئٹ انصاف تننگ نا زمہ وار مرے، و بندغ آتا حق آتا رکھ ءِ کننگ نا زمہ وار ریاست مرے۔ اگہ نن معاشی لبرلزم ءِ ہرن گڑا او پائک کہ آزاد تجارت مرے ہر بندغ دا مارکیٹ ئٹ بے دھڑک تجارت کننگ کے۔ اگہ نن پولیٹکل لبرلزم ءِ ہرن گڑا او پائک کہ ریاست اٹ جمہوریت مرے، ہر بندغ نا سیاسی حق آک یعنی ہیت ئنا حق مرے، آزاتی ئٹ ہیت کننگ کے، گچین کاری تیٹی بشخ ہلنگ نا حق ہر بندغ ءِ مرے، (حکومت نا طاغت اونا ادارہ آتیٹی بشخ مرے یعنی پارلیمنٹ، ایگزیکٹیو و جوڈیشری، اندا سوب آن دا ادارہ آتیٹی اکاؤنٹیبیلٹی مرے و تیوہ غا طاغت اسہ جاگہ آ مف بلکہ کل اٹ بشخ و بانٹ مرے)۔
لبرلزم ءِ اگہ جہانی سیالی (آئی آر) یا جہان نا سیاست ئٹی ہرن گڑا او پائک کہ ڈیلم آتا نیام ئٹی جنگ مف، اوفتا نیام اٹ اواری (انٹرنیشنل کواپریشن) مرے، پین جہانی ادارہ مرے ہرا دنیا ٹی جنگ آتے ایسر کننگ کن تینا کڑدار ءِ سر ایتر، بندغ نا رکھ و چھیٹ، بندغی حق و ڈیلم آتا تین پہ تین نا زی آ ڈیپینڈنٹ مریر، (لبرل انٹرنیشنلزم نا بھلا فلاسفر آک ایمانول کانٹ و وڈرو ولسن ءِ ہرا کہ دنیا ٹی دا تھیوری ءِ اولی جہانی جنگ آن پد دنیا نا مونا ہیسر)۔
لبرلزم نا نظریہ ءِ اگہ بلوچ چاگڑد، سیاست یا تحریک ٹی ہرن گُڑا بلوچ دادے ہچ تینا چاگڑد، سیاست یا تحریک ئٹی جاگہ تتنے۔ بلوچ چاگڑد نا دیہاڑ ءِ ہرن گڑا اوڑے ننے لبرلزم نا رند آک دو بفسہ، انتئیکہ بلوچ نا چاگڑد ٹی انفرادیت نا وجود ہچ متنے انتئیکہ بلوچ چاگڑد ئٹی اندنو گڑا یا قبائلی اسٹرکچر نا جند انفرادیت آن برخلاف تیوہ وڑ ئٹ اسہ جتاؤ ساخت اسے۔ قبائلی چاگڑد ئٹی اسٹ نا جیڑہ کل ئنا جیڑہ مسنے و اسہ اندنو رواداری نا وڑ اس مسنے کہ اوٹی بِجار، پُڑس یا کہ دو شیفی نا وڑک بندغ آتے اوار کرینو اندا سوب آن چاگڑد ٹی دنو شیف بڑزی نا عمل متنے۔ دا گڑا تیان سما تمک کہ بلوچ چاگڑد ئٹی انفرادیت نا زہم آک متنو۔
:بلوچ راجی سُرگھچ و لبرلزم
اگہ نن بلوچ سیاست ءِ ہُرن ولدا ہم نئیکہ دا نظریہ ءِ جاگہ تسنے یا دا خیال ئنا بندغ آک تین کن نئے کہ جاگہ جوڑ کرینو، انتئیکہ بلوچ سیاست نا جند ئنا فطری حوالہ غا انفرادیت آن بھاز مُر ءِ و اجتماعیت نا سیاست ءِ، بلوچ نا سیاست اونا تحریک، اونا ڈغار تون گنڈوک ءِ، دا سیاست ءِ کروکا بندغ آک انفرادیت نا منوک مننگ کپسہ انتئیکہ راجی سیاست اجتماعی راجی مفاد آتا زی آ مریک و لبرلزم تیوہ غا اںفرادیت نا ہیت ءِ کیک، اندا سوب آن لبرلزم بلوچ ناچاگڑد، سیاست و ڈغار آ تیوہ جاگہ کننگ کپک، یا جنجال آتے ایسر کننگ کپک، اندا سوب آن بلوچ نا سیاست ئٹی دا نظریہ جاگہ کننگ کتنے انتئیکہ بلوچ نا چاگڑد اسہ اوار ءُ چاگڑد ئسے و بلوچ نا چاگڑد گواچن ئٹ ہم داڑان چٹ جتا ءِ اندا سوب آن دا نظریہ بلوچ چاگڑد ئٹ جاگہ کننگ کتنے۔
اگہ نن ہرن کہ لبرل خیال نا منوک آک و بندغ آک انت انت جنجال جوڑ کننگ کیرہ، دا خیال نا بندغ آک گل آتا ڈسپلن آن مُر مریرہ و اندا خراب انگا سوچ آتا سوب آن ایلو مخلص و سادہ غا سنگت آتیٹی دا رویہ آتے ہتنگ ناسوب جوڑ مریرہ۔ دا بندغ آک بلے انقلاب نا منوک مریر ولے دا انقلاب ئٹی عملی کڑدار سر تننگ کپسہ، و اندا سوب آن دا بندغ آک ایلو سنگت آتے ہم سرگڑدان کیرہ تینا خراب انگا سوچ آتا سوب آن سنگت آتے ٹی رد انقلابی رویہ تے ودی کیرہ، تینا بے عملی ءِ ڈھکنگ کن ادارہ آتا زی آ وڑ وڑ نا سَٹی ءُ نغد کیرہ، سنگت آتا نیام ئٹ دا انفرادی و رد انقلابی رویہ ودی کیرہ۔ دا خیال ئنا بندغ آک چاگڑد و انقلاب کن بھلو ٹپ جوڑ کیرہ، انتئیکہ انقلاب نا جند اسہ اجتماعی عمل ئسے اندا سوب آن دا ٹی انفرادیت نا ہچ ءُ جاگہ مفک۔
لبرلزم اسہ سیاسی و فلاسفیکل نظریہ ئسے ہرا گیشتر یورپ، امریکہ و ہمو ریاست آتیٹی ارے ہراکہ اسہ دور باری اسیٹی کالونی مسنو۔ یعنی دا نظریہ ءِ دنیا ٹی امریکہ و یورپی ریاست آک مونا ہیسنو، دا ریاست آک اندا نظریہ نا کمک ئٹ جہان نا زی آ تینا تسلط ءِ برجاء تخانو۔
